Departamento di Pesca

Si nos analisa e historia y custumber di piscamento y e influencia cu esaki tabatin y tin ainda na Aruba, nos ta yega na conclusion cu piscamento ta forma parti integral di Aruba su cultura.

Piscamento ta e di dos ofishi mas biew na mundo, cual ta conta pa Aruba tambe, esaki a wordo demostra dor di excavacionan cu a wordo haci full rond di Aruba. Na momento cu colonialistanan Europeo a pone pia riba Aruba pa prome biaha, nan a nota cu parti grandi di e alimentonan tabata proven di lama.

E herencia cultural di piscamento ta fuerte den e character di e Arubianonan, cual por wordo mira na e hecho cu lugarnan di pisca, sitionan pa subi, baha y sconde boto durante mal tempo a keda hopi consistente durante e siglonan.

Desde inicio DLVV a pone infasis riba e necesidad pa hisa e aspecto di concientisacion di seguridad riba lama. Regularmente DLVV y Centro di Pesca Hadicurari ta duna charlanan tocante e seguridad riba lama y ta encurasha piscadornan pa prepara nan mes pa cualkier eventualidad.

Un di e puntonan  cu DLVV ta pone hopi infasis riba dje ta pa tur e piscador percura cu un hende na tera sa di nan paradero y orario di regresa tera, esaki lo haci un mission di Search and Rescue hopi mas facil y cu posibel resultadonan positive.

Peskeria tin un balor grandi pa Aruba, y pa tal motibo DLVV tin como meta pa guia esaki den un direccion sostenibel.