Santa Rosa

Na aña 1976 Directie Landbouw, Veeteeldt, Visserij en Markthallen (Santa Rosa) a wordo estableci como un projecto experimental di Gobierno.

Despues di añanan di neglicencia y cu empleadonan demotiva y mirando cu agricultura, cria y pesca ta forma parti integral di nos historia y cultura, Gobierno a dicidi di duna extra atencion na e departamento aki y asina crea un plan di maneho flexibel y inovativo pa hiba e departamento di DLVV den un direccion nobo.

E meta di e maneho nobo aki tabata pa mehora e servicio brinda na pueblo en general pero muy en particular pa e Agri/Horticultor, Criador di bestia, Piscador y muchanan di scol.

E vision di Santa Rosa ta pa e departamento bira un lider den informacion, investigacion, inovacion y guia riba tereno di Agricultura, Cria, Pesca, un departamento unda e cliente ta central y tin trahadornan contento y servicial.

Durante e ultimo añanan, bou di maneho di Minister Otmar Oduber, conhunto cu directora Nathalie Maduro, e departamento a mira un remodelacion completo.

A haci introduccion di mercadonan di Santa Rosa, cual tur luna ta duna pueblo e oportunidad di cumpra fruta, berdura y otro productonan organico produci na Aruba mes. Alabes criadornan di bestia ta haya e oportunidad di bende nan carninan fresco cual ta aporta na nan economia.

Cu orguyo por a tuma nota con e productonan di agricultura y cria local ta wordo usa den platonan na restaurantnan renombra rond di Aruba.

Cumpliendo cu e vision pa sostene e Agricultor y Criadornan di bestia local, Santa Rosa ta introduciendo un programa nobo cual lo insera cu tur Agricultor y Criador cu ta inscribi na Santa Rosa lo ricibi un carnet di miembresia, cu cual carnet nan lo ricibi descuento na diferente companianan cu ta sostene Agricultura y Cria.

Durante e ultimo aña Santa Rosa a sa di cumpli cu projectonan grandi manera “10 mill mata di fruta pa Aruba”, a expande flota di empleado, a duna sosten na abattoire y a engrandece nan surtido di producto.

Pa e aña venidero Santa Rosa tin hopi plannesnan den processo cu e solo meta pa duna sosten na e agricultor y criador di bestia, informacion na e studiantenan y un servicio exceptional na pueblo completo.

Bou di e maneho nobo di Santa Rosa y danki na e determinacion di empleadonan dedica, e departemento a sa di demostra di ta uno esencial y necesario pa pais Aruba.