Santa Rosa cu Grandioso Mercado dia 27 di september na Carubbian Festical

“Santa Rosa cu otro grandioso mercado durante Carubbian Festival”

“Celebrando dia international di Turismo”

Diahuebs dia 27 di september, Santa Rosa lo ta presente unbiaha mas na Carubbian Festival na San Nicolas, e biaha aki en conexion cu e celebracion di dia di Turismo.

E anochi aki lo ta uno grandi unda Santa Rosa lo ta presente cu un otro mercado espectacular manera cu Santa Rosa ta conoci pe, celebrando dia international di Turismo. Lo tin tentnan di Santa Rosa presente bendiendo cumindanan crioyo manera sopinan di carni, pampoena, klem y sin lubida e tan gusta sopi di lion fish. Tambe lo tin tentnan bendiendo tur sorto di bolo y batido di fruta local manera sorsaca, tamarijn, lamoenchi y papaya. Pa e vegetarianonan lo tin un tent special bendiendo tur sorto di snacks vegetariano.

Tentnan bendiendo matanan di fruta tambe lo ta presente, pa asina promovee plantamento na cas.

Tur presente lo tin e oportunidad di baila y disfruta di e show di baile den trahenan carnavalesco y bandanan local manera Climaxx riba stage principal y Oreo riba e di dos stage na Charlies Bar.

Alavez lo tin e apertura oficial di habrimento di oficina di Turismo na San Nicolas.

Santa Rosa ta extende palabranan di invitacion na pueblo completo, pa bin celebra e dia aki y alavez disfruta di e grandioso mercado di Santa Rosa.