Sera conoci cu e Cabrito y Carnenan di Santa Rosa

Cabrito y Carne semper a forma un parti importante di cria di bestia na mundo, como tambe na Aruba. Ta existi e creencia cu e domesticacion di cabrito y carne a sosede mas o menos 10.000 aña prome cu Cristo, den e seronan di Asia. Nan ta wordo concidera un di e mamiferonan mas antiguo domestica tanto pa produccion di carni como lechi.

E cabritonan “crioyo” cu nos tin aki na Aruba, otro islanan y paisnan Latino Americano a wordo treci pa e prome colonisadornan Spaño cu a yega den e area aki.                                                

Actualmente na Santa Rosa nos tin 3 diferente rasa di cabrito y 1 di carne, cual cada uno ta wordo usa pa un proposito diferente.

E rasa di cabrito conoci como Anglo Nubia, desendiente di Zuid Africa ta esun mas popular na Merca y como tambe na Aruba. E ta wordo usa pa produccion di lechi cual ta di bon calidad y cu un contenido halto di vet, ideal pa traha keshi. Nan tamano ta grandi, cu horea largo, hancho y cu ta colga. Nan caracter ta uno orguyoso y elegante.

Toggenburg ta un rasa di cabrito cu ta bini for di noordwest di Suisa, di tamanjo mediano, cu lana cortico, suave y fini. Nan ta cabritonan masha docil y facil pa traha cu nan. Na Aruba nan tambe ta wordo usa pa produccion di lechi.

 Tur mainta entre 7or cu 8or na Santa Rosa e cabritonan aki ta para den rij cla pa nan wordo chica y asina cumpli cu nan deber di produccion di lechi.

 Otro rasa interesante ta e rasa Boergeit cu ta wordo cria pa nan carni, cual ta uno di calidad halto y masha gusta. E rasa aki ta nativo for di Sur Africa, pero a drenta Hulanda den un forma di "smokel".

 Pa motibo di malesanan e rasa aki a wordo prohibi di sali for di Sur Africa , cual a haci cu un pareha Hulandes a dicidi di "smokel" algun embrio pa Hulanda. Despues di a "smokel" e embrionan, esakinan a wordo transferi pa matris di cabrito na Hulanda, creando e rasa "boer".

 E carne rasa Dorper cu curpa blanco y cabes y neck preto y White Dorper cu ta completamente blanco ta wordo cria mescos cu e Boer specialmente pa produccion di carni. Un lamchi Dorper y White Dorper ta cla pa consumi despues di 4 pa 5 luna di naci.

 Lechi cu wordo produci dor di e cabritonan aki por wordo cumpra na Santa Rosa hunto cu guia y conseho con pa traha bo propio keshi na cas. Nos cabrito y carnenan ta wordo bendi na criadornan cu e proposito di reproduccion.

 Tur e cabrito y carnenan na Santa Rosa ta wordo cria diariamente cu hopi amor y e mihor cuminda disponibel, pa asina segura e calidad halto di lechi y carni pa consumidornan.

 Algun tips con pa cria cabrito y carne :

 * Traha un cura of stall adequa pa bo bestianan. Esaki ta importante pa mantene bo bestianan hunto pero tambe pa mantene animalnan peligroso lew for di bo bestianan. Corda pone un afdak unda nan por sconde pa solo of mal tempo. Baki pa cuminda y cage special pa transporta cabrito y carne ta obtenibel na Santa Rosa.

 * Mantene nan cura of stall seco, ya cu esaki ta prevendi cu nan lo haya problema cu nan hoof of otro malesanan manera entro otro sarna y parasito.

 * Duna bo bestianan remedi contra parasito cual ta obtenibel na veteriniario.

 * Corta y cuida e hoofnan di bo bestianan. Instruccion con pa haci esaki por wordo haya na Santa Rosa.

 * Cabrito y carne cu ta los den naturalesa lo come mata y flornan pero tambe mester percura pa nan tin hooi (alfalfa) y cominda concentra tur dia pa nan come.

 * Semper percura pa bo bestianan tin awa fresco tur dia.

 Santa Rosa ta ofrese servicio di corta hoof, pela carne y capa bestia, como tambe ta bende hooi (alfalfa), cuminda concentra y otro productonan pa cuida bo bestianan.

 Pa mas informacion riba compra di productonan local y tips con pa planta na cas y cria bestianan tuma contacto cu Santa Rosa na This e-mail address is being protected from spambots. You need JavaScript enabled to view it. of sigui nos riba facebook.

"BAN SOSTENE NOS CULTURA, PRACTICA CRIA, PESCA Y AGRICULTURA"